Ervin Gjonaj, inxhinier elektrik në Britani të Madhe prej 23 vitesh, thotë se vendi ka nevojë për forcë punëtore për arsye se mungon krahu i punës.
Në një lidhje me Skype për emisionin Opinion në Tv Klan, Gjonaj u shpreh se në Britani numri i vendeve bosh të punës mund të kapë shifrën e 2 milionëve.
Ndërsa theksoi se një rrogë elektricisti në Britani të Madhe ka arritur deri në 280 Paund në ditë. Blendi Fevziu: Ju më thatë herën e kaluar që Britania ka rreth 1.5 milionë vende pune bosh apo jo?
Ervin Gjonaj: Patjetër. Madje mund të arrijë, nëse qeveria do të marrë përsëri ato vendime, pretendohet që në Prillin e ardhshëm, kur të mbyllet viti taksor, mund të arrijë numri 2 milionë vende pune bosh.
Blendi Fevziu: Kështu që është e interesuar dhe Britania të thithë emigrantë për të mbushur këto vende? Ervin Gjonaj: Patjetër. Unë jam inxhinier në punën time të përditshme.
Dhe në të tre projektet që unë punoj, jemi me 3 ose 4 muaj vonesë për arsye të forcës punëtore. Nuk kemi forcë punëtore për të realizuar projektet. S’ka krah pune. Unë jam inxhinier elektrik. Një elektricisti në Britani ka arritur t’i shkojë rroga në 280 Paund në ditë.
