Dhjetëra pjesëtarë të shoqatave të komunitetit shqiptar të Selanikut kanë marrë pjesë në mbrëmjen e organizuar nga Konsullata e Përgjithshme e Shqipërisë në këtë qytet,me rastin e 110 vjetorit të Pavarësisë.
Në fjalën e hapjes konsulli i përgjithshëm i Shqipërisë në Selanik, Arqile Sota ka përshëndetur të pranishmit duke theksuar rëndësinë e jashtëzakonshme të datës 28 Nëntor të vitit 1912, në historinë e popullit shqiptar. Gjithashtu ka theksuar rolin e rëndësishëm të emigrantëve në marrëdhëniet midis dy vendeve fqinje.
Të ftuar në aktivitet kanë qenë bashkatdhetarë jo vetëm nga Selaniku, por edhe nga qytetet e Greqisë së Veriut si dhe dhjetëra personalitete të shquara të jetës politike e shoqërore greke.
Kanë përshëndetur të pranishmit me fjalime të shkurtra Stavros Kalafatis ministër i Maqedonisë dhe Trakës si dhe Konstantinos Zervas , kryebashkiaku i Selanikut.
Gjithashtu kanë uruar festën kombëtare të Shqipërisë edhe shumë prej krerëve të trupave diplomatikë të qytetit.
Një ngjyrë të veçantë i kanë dhënë mbrëmjes grupi i valleve të shoqatës “Fari” me motive nga treva të ndryshme të Shqipërisë.
