Ka shumë konfuzion mbi situatën e krijuar në Durrës, ku kanë ngordhur qindra-mijëra pula. Fermerët dhanë alarmin se numri i shpezëve të ngrodhur kishte shkuar në 500 mijë krerë, ndërsa Ministria e Bujqësisë u mundua ta relativizonte çështjen, duke thënë se kanë ngordhur 200 mijë krerë pula.
Situata është bërë edhe më problematike, sepse ekziston frika e përhapjes së sëmundjes së pulave edhe te njerëzit. Pulat e ngordhura duhet të groposen, por autoritetet përkatëse shtetërore nuk kanë lëvizur as gishtin. Ish-ministri i bujqësisë, një nga profesorët e kësaj fushe, Edmond Panariti, ka dhënë alarmin për autoritetet shtetërore në vend:
“Ka kohë që vëndet fqinj, raportojnë vatra të konfirmuara të gripit të shpendëve H2N5, në pulari dhe shpendë shtegëtarë. Masat kanë qenë të rrufeshme dhe radikale. Infeksioni është izoluar dhe mbajtur në kontroll nga fqinjët.
Prandaj, shërbimi epidemiologjik, sistemi “alert” dhe shërbimi veterinar te ne , duhet të ndiznin prej kohësh alarmin e kuq. Bomba me sahat në fakt kishte filluar të punonte mbrapsh, sepse kjo sëmundje nuk njeh kufij dhe as qeveri .
Shpërthimi do të ndodhte siç edhe ndodhi. Prandaj, që nga çasti që infeksioni shpërtheu te ne, duke shkaktuar qindra-mijëra dëmtime, duhej vepruar me masa drakoniane asgjësimi, karantine, largimi urgjent të shpendëve të ngordhur dhe djegja e tyre e kontrolluar, kontroll serologjik i personelit të pularive
Rrethim dhe izolim i rreptë i vatrave. Por ajo që të habit është se për dy javë u humb kohë me hipoteza pa bazë që nga helmimi ushqimor e deri te bronkito-trakeitet e laringitet…, të cilat bllokuan aksionin, veprimet masat për bllokimin e përhapjes së virusit.
Rezultati…. Një milion ngordhje dhe nuk i dihet fundi. Një goditje e rëndë jo vetëm për rritjet industriale, por edhe për shpendët e oborreve. Dhe ende nuk i dihet fundi. Mund të kemi shfarosje të shpendarisë.
Sektori ku kishim krijuar me mund një autonomi furnizimi me mish dhe vezë kërcënohet rëndë. Pirgjet me pula të infektuara dhe të ngordhura duhen asgjësuar sa më parë. Nuk këshillohet groposja.
Një këshill teknik dhe shkencor epidemiologësh dhe virologësh të drejtojë gjithë procesin. Të gjithë në terren, pushtet qendror, lokal, inspektorë dhe veterinarë për të ndalur këtë flamë”.
